• Kontakt
• Informasjonsmateriell
• Fagrådet

Samfunnsoppdraget

Fleire hundretusen menneske i Noreg har nedsett syn, dysleksi eller andre funksjonsnedsettingar som kan gjere det vanskeleg å lese visuell tekst og papirbøker. Tibi skal bidra til at menneske som har lesevanskar, kan delta i samfunnet på linje med andre. Vi jobbar for eit samfunn der alle har tilgang til litteratur og informasjon.

Tilbodet

Tibi produserer og låner ut lydbøker, e-bøker og bøker i punktskrift. Vi har bøker for barn, ungdom og vaksne. Tilbodet omfattar studielitteratur for studentar på universitet, høgskule og fagskule.

Det er gratis for målgruppa å bruke tilbodet.

Vi samarbeider nasjonalt og internasjonalt med andre produsentar av tilrettelagd litteratur.

Organisering

Tenesta Tibi driftast av 37 tilsette i avdeling for tilrettelagd litteratur i Nasjonalbiblioteket. Nasjonalbiblioteket er underlagd Kultur- og likestillingsdepartementet og får mål for verksemda og krav til rapportering i det årlege tildelingsbrevet frå departementet. 

Historikk

I mai 2024 byte Norsk lyd- og blindeskriftbibliotek (NLB) namn til Tibi – Biblioteket for tilrettelagd litteratur. Året før gjekk NLB frå å vere ei eiga verksemd til å bli avdeling for tilrettelagd litteratur i Nasjonalbiblioteket. Oppdraget og tilbodet blei vidareført som ei teneste frå Nasjonalbiblioteket.

Universell utforming av litteratur

Vi samarbeider med dei nordiske søsterbiblioteka våre om å legge til rette for universell utforming av litteratur. Her kan du lese den felles erklæringa vår.