• Kontakt
• Informasjonsmateriell
• Brukerråd

Samfunnsoppdraget

Fleire hundretusen menneske i Noreg har nedsett syn, dysleksi eller andre funksjonsnedsettingar som kan gjere det vanskeleg å lese visuell tekst og papirbøker. Tibi skal bidra til at menneske som har lesevanskar, kan delta i samfunnet på linje med andre. Vi jobbar for eit samfunn der alle har tilgang til litteratur og informasjon.

Tilbodet

Tibi produserer og låner ut lydbøker, e-bøker og bøker i punktskrift. Vi har bøker for barn, ungdom og vaksne. Tilbodet omfattar studielitteratur for studentar på universitet, høgskule og fagskule.

Det er gratis for målgruppa å bruke tilbodet.

Vi samarbeider nasjonalt og internasjonalt med andre produsentar av tilrettelagd litteratur.

Produksjon og bruk

Tibi produserer bøker etter åndsverklova §§ 55 og 56, som gir adgang til å lage tilrettelagd litteratur for personar med funksjonsnedsettingar utan å innhente samtykke frå rettshavarane.

Materialet som Tibi gjer tilgjengeleg, er verna av åndsverklova. Rettshavarane tar uttrykkeleg atterhald mot at heile eller delar av materialet, inkludert innlesinga, blir brukt i tekst- og datautvinning. Det inkluderer trening av kunstig intelligens, jf. artikkel 4 i DSM-direktivet om opphavsrett i EU. I praksis betyr det at materialet ikkje kan brukast til slike formål utan løyve frå rettshavarane.

Organisering

Tenesta Tibi driftast av tilsette knytta til avdelinga bibliotektenester i Nasjonalbiblioteket. 

Nasjonalbiblioteket er underlagd Kultur- og likestillingsdepartementet og får mål for verksemda og krav til rapportering i det årlege tildelingsbrevet frå departementet. 

Historikk

• 2026: Avdelinga tilrettelagd litteratur blir lagd ned og går inn i den nyoppretta avdelinga bibliotektenester. Tibi held fram som ei teneste frå Nasjonalbiblioteket.
• 2024: Norsk lyd- og blindeskriftbibliotek (NLB) bytte namn til Tibi – Biblioteket for tilrettelagd litteratur.
• 2023: NLB gjekk frå å vere ei eiga verksemd til å bli avdeling for tilrettelagd litteratur i Nasjonalbiblioteket. Oppdraget og tilbodet blei vidareført som ei teneste frå Nasjonalbiblioteket.